Američka pop zvijezda Majli Sajrus optužena je da su ona i koautori njenog singla iz 2023. godine "Flowers" kopirali djelove pjesme Bruna Marsa iz 2013. "When I Was Your Man".

Tužba je podnijeta u ponedjeljak saveznom sudu u Los Anđelesu od strane kompanije Tempo Music Investments, koja tvrdi da "Flowers" sadrži neovlašćenu "eksploataciju" pomenute pjesme. Kao koautori su navedeni Gregori Hajn i Majkl Polak, dok su Sony Music Publishing, Apple, Target, Walmart i druge kompanije optužene za distribuciju pjesme.

Bruno Mars, međutim, nije imenovan kao tužilac. Tempo Music je saopštio da posjeduje dio autorskih prava na pjesmu "When I Was Your Man", kupljen od koautora Filipa Lorensa.

Tempo Music traži naknadu štete, čiji iznos još nije utvrđen, kao i zabranu Sajrus da reproducira, distribuira ili javno izvodi pjesmu.

"Svaki ljubitelj pjesme Bruna Marsa 'When I Was Your Man' zna da 'Flowers' Majli Sajrus nije ostvarila taj uspjeh sama po sebi. 'Flowers' kopira brojne melodijske, harmonijske i lirske elemente pjesme 'When I Was Your Man', uključujući melodijski raspored tonova i redosljed stihova, bas liniju, određene taktove refrena, određene muzičke elemente, lirske elemente i specifične progresije akroda", navodi se u tužbi.