„Na izdržavanje kazne zatvora osuđeno lice upućuje nadležni osnovni sud. Nadležni sud dužan je preduzeti potrebne radnje i pozvati osuđeno lice radi uručenja uputnog akta za izdržavanje kazne zatvora. Sud dostavlja Zavodu pravosnažne presude na izvršenje zajedno sa uputnim aktom koje je potpisalo lice koje je obavezno da se odazove pozivu na izdržavanje zatvorske kazne. Ako se uredno pozvano osuđeno lice određenog dana ne javi na izdržavanj e kazne zatvora, Zavod za izvršenje krivičnih sankcija će o tome obavijestiti nadležni sud koji će dalje preduzeti radnje iz svoje nadležnosti", saošteno je iz Zavoda za izvršenje krivičnih sankcija.

Iz ZlKS-a su kazali da ne postoji takozvana "lista čekanja" na izvršenje kazne, kao što je to slučaj sa gotovo svim zemljama u reginu. Osuđenici koji se sami odazovu na izdržavanje kazne ili ih po nalogu suda, sa lisicama na rukama privedu policijski službenici, bez odlaganj a počinju odbrojavati zatvoreničke dane u zatvorskim jedinicama u Spužu ili Bijelom Polju.

Iako je trenutno je u crnogorskim zatvorima evidentirano 1.238 pravosnažnih presuda "koje nijesu izvršene iz razloga neodazivanja osuđenih lica" samo manji broj je onih kojima se na teret stavljaju naročito ozbiljna krivična djela poput ubistva. 

Ovo zbog toga što zakon u takvim slučajevima, opravdava pritvor kao mjeru obezbjeđenja osumnjičenog odnosno optuženog tokom vođenja sudskog postupka. 

Ukoliko se postupak okonča osuđujućom presudom, pritvorenik se seli u zatvor, a vrijeme koje je proveo u pritvoru uračunava se u kaznu na koju je osuđen. Nasuprot tome, ukoliko bi ishod postupka bio oslobađajuća presuda, sljeduje mu naknada štete za vrijeme provedeno u pritvoru, a novac pada na teret poreskih obveznika.

Iako smještajni kapaciteti ZIKS-a zadovoljavaju potrebe trenutnog broja osoba upućenih na izvršenje kazne zatvora, iz ove ustanove najavljuju konkretne planove na dodatnom proširenju zatvorskih prostorija.