"Bijela kuća i američka Uprava za hranu i ljekove (FDA) odobrile su zahtjev Liberije o slanju eksperimentalnog seruma za liječenje liberijskih ljekara inficiranih ebolom", saopštile su kasno sinoć vlasti u Monroviji. 

Predsjednica Liberije Elen Džonson Sirlif zatražila je prije četiri dana od američkog kolege Baraka Obame i SZO slanje lijeka. 

SZO je juče iza zatvorenih vrata razmatrala to pitanje, a danas će saopštiti zaključke sa sjednice stručnjaka za medicinsku etiku. 

Zemlje pogođene ebolom zainteresovale su se posljednjih nekoliko dana za eksperimentalni lijek "ZMapp", proizveden u jednoj privatnoj laboratoriji u SAD, a do sada nije testiran na ljudima. 

Taj serum je dat američkom ljekaru koji je obolio u Liberiji kao i španskom svešteniku takođe oboljelom u Liberiji. Za sada nije saopšteno kako oni reaguju na lijek. 

Laboratorija Map Bio (Mapp Bio), koja je proizvela eksperimentalni lijek u saradnji s jednom kanadskom kompanijom, navodi da se lijek pravi na osnovu lista duvana i da je za sada teško proizvoditi velike količine lijeka. 

Lijek je za sada uspješno testiran na majmunima. 

Prema posljednjim podacima SZO, od ebole su umrle 1.013 osoba od 1.848 inficiranih u Gvineji, Sijera Leoneu i Liberiji. 

Od 9. avgusta registrovana su 52 nova smrtna slučaja - 29 u Liberiji, 17 u Sijera Leoneu i šest u Gvineji.

(Beta)